Rom 6 | ASO | STEP | Ido' lihime daa' monovo naba o'mo vo minida nene a'mine naba o'mo vine' votigile nene ivile' goloso ivosa O'moso'mi nasahili' nene atoli'mine ogo soto' ogo minine' nenako nemu' nene laza nadive lolone. O'moso'mo nasahili' gohi vauve elo o-ledeline' aka nene do soto' oloseize. Lihime nene daakovo' ogo minuke'zo lolobe.

Romans 6

Laza Nene Kilisitolesi Maka' Hilune' Gelavo Lihime Daa' Monovote Osu' Lavo Kilisitolesi Maka' Oto Gohi Minevo' Alevo' Ogo None' Gelavo Monovo Lisihe' Laminekovo' Ogo Molo Mineloningumu' Paulo' Line' Gamazi

1 Ido' lihime daa' monovo naba o'mo vo minida nene a'mine naba o'mo vine' votigile nene ivile' goloso ivosa O'moso'mi nasahili' nene atoli'mine ogo soto' ogo minine' nenako nemu' nene laza nadive lolone. O'moso'mo nasahili' gohi vauve elo o-ledeline' aka nene do soto' oloseize. Lihime nene daakovo' ogo minuke'zo lolobe. 2 Mo keke' ne'mine ma lamolosune. Laza nene hilunive gelo mino hilave nete inite' hamokumukisi upuho' isa'mani' ne'mino upuho' ogo lihime gohi damolonido' mine molo nonive nete nene lihime daa' monovo nene gohi do oto ogo molo minelonido' nene mo keke' nomive. 3 Ido' Kilisitoda gi'mizo minelone lo noso hulunive laza muki' ne'mino noso huluningu' nene ezesi maka' lohoto' zalo' hilune' gilivo none' nenako nemu' nene lingine gilamahe. 4 Ne'mino neine' nenako nemu' nene laza noso huluningu' nene ezesi maka' helosa ezesi maka' gonoso galesela vo minune' gele neive. Ido' noso huluningu' ne'mine ine' nene Kilisito'ni nene meleho O'moso'mo amuzo've atoli'mine ogo minine' nene do soto' ogo hilinguti' do ote-davo neine' ne'mino lazasi nene a'mine'mine ogo ezesi maka' otosa minevo' alevote nene gosoho' lolo' ogavo igi mili minilizave losa ne'mine ine' ve.

5 Ee, ezela gi'mizo mino ei' hilidi'mine ogo lazasi maka' hilune' giline' nenako nemu' nene aza hilinguti' otidi'mine ogo lazasi nene ha ote none' gilivosa minelesune. 6 Laza ti' lo gele none: Lihime monovo goloso ne'mo okodela gono daa' ine' nene osu' lavo laza lihime monovolo' gohi gelekele' ogo minamoloningumu' nene lemeni dameni litehe nene Kilisito'nisi lohoto' zalo' bili nizani' ma neive. 7 Ido' ne'mine noluvoni' nene nemu' noluve: Ve'inesi mini lihime monovolo' gelekele' igi mini hilangu' nene a'mine monovosi huko vavosa hilave nene lihime monovo'mi gelekele' ve gohi ma minami haza minaa' nave. 8 Laza nene Kilisitolesi maka' hilune' ma nenako laza nene ezesi maka' minevo' alevo' ogo minelesune lo mo gele mu'musi' gehepeve o none. 9 Ido' ne'mine lo gele mu'musi' o none' nene Kilisito' hilinguti' otine' nene aza helaali'mi gesi minguti' nene mudise lemo heta ogani' nenako gohi helamoloseive lo gele minosa nene laza gele mu'musi' o none. 10 Ido' hiline' nene lihime monovoli'mi amuzo nene mudise do nohulosa hiline' ve. Ido' gohi minevo' alevo' neine' nene O'moso'mine nene minevo' alevo' o do neive. 11 Ido' lingine lengikumu' nesi nene ti' li gili minilo: Laza nene mo hilune' gilivo mino lihime nene gohi ma damolone. Ido' minevo' alevo' ogo minelone' nene mo Izesu' Kilisitoda gi'mizo mino O'moso'mine nene minevo' alevo' o do minelesune.

12 Nemu' nene okodine heleline' akalo' mine molo neine' ne'mo nene lanite' gelo dalosa giline' goloso nite' nene mo di minilizave lo lihime monovo ne'mo nene do eita ogo do gelekele' o-lengedalize. 13 Lingine okodidoti' gizedine adine ne'mine nehe nanitetine nolihe inite' hamokisi nene goloso nite' dalive li lihime monovoli'mi gono daa' inite' ne'mine nene lolo' i-damilo. Asi hiluninguti' nene otosa gosoho' lemeni damenilo' minevo' alevo' ogo none' nenako nemu' nene laza okodelati' gizede ade nevo'mine nehe ido' nanitete nolihe neve nene O'moso'mine emekunivo ei' gono daa' ine' inite've ne'mine lolo' ogavo monovo lisihe' laminekovo' ilive lii okodine muki' nene O'moso imilo. 14 Ee, lingine nene Mose' lou' gamazi'mi gesi mingu' nene minami O'moso'mi nasahilili'mi gesi mingu' imi nizani' nenako nemu' lengi' nene lihime monovoli'mo eita do gelekele' o-lengedelido' minamave.

Lihime Monovoli'mi Gelekele' Ve Minaatotikisi Ido' Monovo Lisiheli'mi Gelekele' Ve Minaatotikisi Nene Gihile've Ato Ato' Soto Oga' Neive Lo Paulo' Line' Gamazi

15 Ne'mino neine' nenako nadolone. Laza nene lou' gamazi'mi gesi mingu' minamo O'moso'mi nasahilili'mi gesi mingu' none' nenako lou' gamazi nene avuto' ogo ha gopo lihime daakovo' olobe. O'ove. Mo keke' ne'mine amolosune. 16 Lingine ve mali'mi gelekele' ve lolo' ogo ei' gamazi've gele dalone li vi gi'mizi eito' gelekele' i-di'mi vi minilizani' ne'mo nene mo ei' gelekele' ve gehepeve nene nizave. Ido' lihime monovolo' gelekele' igi minilizani' ne'mi gihile nene helaa' nene do soto' o-lengedeleseive. Ido' O'mosolo' gelekele' igi minilizani' ne'mi gihile nene O'moso'mo evene' lisihe' ve lo-lengedeleseive. Ne'mino neingumu' nene lingine gilamani' nehe. Mo gili nilisave. 17 Ne neiha lingine gomu' nene lihime monovoli'mi gelekele' ve minani'za Kilisito' gonou' velite apizi lingimi di gelekele' i-lingidani' gamazi'mi monovolo' lutine milisa e'metani' nenako nemu' nene O'mosomu' tangezo' ve lolone. 18 Ee, lingine nene lihime monovolo' gelekele' igi minanguti' nene O'moso'mo do kuluhize-lengedavo monovo lisihe' lamineli'mi gelekele' ve lili' ikeve. 19 Ne'mine noluvoni' nene lingine nene haza evene' leli' ne'mine mini naza gamazi gihilelo' e'meto ma loloni' nene lingine a'mine'mi monovo gililizado' lisihe' amani' nenako nemu' nene ne'mine amo ha eveneliti gamazilo' do molo ne'mine noluve. Ido' lingine gomu' nene okodido' gizedine adine ne'mine initetine muki' nene lou' avuto' igi lutine do goloso oga' monovolo' di gelekele' i-ngidisa lou' avuto' iga' ave gehepeve lili' ani' ma'mine igi O'moso'mi evenele gehepeve minelonido' do lisihe' oka' oka' okunivo lute lisihe' lamine' gehepeve ilive li monovo lisiheto' nene a'mine okodine nene di gelekele' i-dilizave. 20 Ne'mine ilizave luvoni' nene nanitekumu' ve. Lingine gomu' nene lihime monovoli'mi gelekele' ve mini monovo lisiheto' nene gelekele' isa'mani'za 21 ne'mine adoti' nene gihile've nanite' soto' oga' ine' neve. A'mine lingine ne'mine iga' adoti' idise longovozo hilaa' nani' inite' ne'mo nene mo helaa' nene do soto' neive. 22 Ne'mine oga' neine'za idise lingine lihime monovolo' gelekele' oga' aka nene mudise huli O'mosolo' gelekele' igi minadoti' nene gihile've nene lutine lisihe' o'mo vo osu' lavosa ne'mo nene mo minevo' minevo' minaa' lengemeni dameni dalisave. 23 Ee, lihime monovoli'mo nene meni've meni hizaa' neine' nene mudise helaa' monovo ne neiha Guvetesi ve Izesu' Kilisitoda vo gi'mizekunivo O'moso'mo haza gidini lehize-ledaa' neine' inite' nene minevo' minevo' minaa' lemeni dameni ne neive.